Camalka wanaagsan ee la joogteeyo wuxuu leeyahay saameyn la taaban karo, Rasuulka (NNKH) wuxuu yiri:
أحب الأعمال إلى الله، أدومها وإن قلّ.
Wuxuu yiri: "Camalad loogu jecel yahay xagga Ilaahay waa kuwa la joogteeyo, xataa haddii ay yaraadaan." (Saxiix al-Bukhaari)
Xadiiskan wuxuu si cad u muujinayaa in camal yar oo si joogto ah loo qabto uu ka fadli badan yahay camal badan oo si goos-goos ah ama mar-mar ah loo qabto. Tani waa xikmad qoto dheer oo Islaamku ina barayo — in Eebbe uu jecel yahay camalka la sii wado xitaa haddii uu yahay wax yar.
1. Joogtaynta Camalka iyo Gaaritaanka Yoolka
Cilmi-baarayaal badan waxay isku raaceen in guusha qofka aysan ku xirnayn hal-abuur ama maskax kaliya, balse ay ku xirantahay sidoo kale awoodda uu u leeyahay sii wadidda camalka, xitaa marka uu dareemayo daal ama caajis.
Tusaale: Qof doonaya inuu barto xifdinta Qur'aanka Kariimka ah, haddii uu si joogto ah u akhriyo oo u xifdiyo hal bog maalintii, muddo hal sano ah wuxuu baran karaa Qur'aankoo dhan (maadaama Qur'aanku ka kooban yahay qiyaastii 604 bog). Inkastoo hal bog maalintii uu yahay dadaal yar marka la eego, joogtaynta camalkaas yaryar ayaa keenta natiijo weyn.
2. Saameynta Maskaxeed iyo Nafta
Joogtaynta camalka waxay maskaxda u sheegtaa in howlaha la qabanayo ay yihiin kuwo muhiim ah. Markasta oo camal la sii wado, maskaxdu way la qabsataa, waxayna bilaabtaa in ficilkaas uu noqdo caado (habit).
Qofka sameeya 10 daqiiqo oo jimicsi fudud ah maalin kasta — sida socod, orod yar ama is fidin — wuxuu si tartiib ah u horumarinayaa caafimaadkiisa jir ahaaneed iyo maskaxeed, wuxuuna iska yareeyaa halista cudurrada sida macaanka, cadaadiska dhiigga iyo buurnidaba.
3. Faa'iidooyinka Nafsi iyo Bulsheedba
- Kalsooni: Camalka joogtada ah wuxuu kobciyaa kalsoonida qofka.
- Qaan-gaarnimo: Joogteynta camalka waa astaan muujinaysa bisayl maskaxeed iyo akhlaaqeed. Qofka ku dadaala camal joogto ah — xitaa haddii uu yar yahay — wuxuu muujinayaa in uu yahay qof mas'uul ah, go'aan adag leh, kana run sheegaya niyadiisa iyo rabitaankiisa.
- Isku halayn: Bulshada waxay jeclaanaysaa qofka lagu kalsoonaan karo ee ficilkiisu yahay mid la saadaalin karo.
4. Talooyin Lagu Joogteeyo Camalka
- U qaybi howlaha qaybo yar-yar oo fudud.
- Samee jadwal joogto ah (tusaale: 10 daqiiqo Qur'aan subax walba).
- U sabar naftaada, hana ku degdegin natiijada.
- Ku xisaabtan Alle, hana is barbardhigin dadka kale oo camalkaaga hala barbardhigin dadka kooga.
Gunaanad
Camalka la joogteeyo wuxuu leeyaay barako, fursad, iyo xoog aan si fudud lagu arag. Haddii aad rabto guul, barwaaqo, iyo raalli ahaanshaha Eebbe, waa inaad yeelataa camal joogto ah – xitaa haddii uu yar yahay. Waayo, sida ay tahay xigmadda Muslimka:
"Camalka yar ee joogtada ah, wuxuu ka fiican yahay camal badan oo mar ah oo la iloobo."
Alxamdulillaah.
F.G: Qoraalkan waxaan ka habeeyay xog aan helay oo aan isugu keenay si habaysan.